CEBU, Philippines – Gipusil patay sa armadong mga tawo ang kasamtangang konsehal ug kanhi mayor sa Lungsod sa Medellin nga si Ricardo Ramirez sulod sa lawak sa Bogo-Medellin Medical Center diin siya gi-hospital arrest niadtong Martes sa gabii.
Gibana-banang 15 ka armadong lalaki ang niatake sa tambalanan nga nahimutang sa Barangay Luy-a sa maong lungsod ug gipangita si Ramirez.
Ang security guard sa tambalanan nga si Carlito Busas nagkanayon nga pasado alas 11 sa gabii, tulo ka sports utility vehicles (SUV) ug usa ka puti nga Sedan ang kalit niabot sa tambalanan ug pagkanaug sa mga sakay, gidisarmahan siya ug gipahapa ang tanang tawo sa hospital.
Nagsul-ob og itom nga jacket ug mga bonnet ug armado og M16 ang mga sakay sa maong mga sakyanan.
“Ang uban nanulod, naa puy nabilin sa amo gitutokan mig armas nihupo na lang mi kay wa na mi nahimo,” sigun sa guwardiya.
Giingong mga tagalog ug mga bisaya ang pinulongan sa mga armadong tawo.
Sa imbestigasyon sa kapolisan nasayran nga sa pagsulod sa mga armadong tawo gipangita niini ang lawak ni Ramirez.
Si Jail Officer 1 Renan Pableo sa Bureau of Jail Management and Penology (BJMP) nga maoy bantay kang Ramirez niasoy nga nanan-aw ra sila og telebisyon niadtong higayuna kauban ang uyab sa anak sa biktima nga giila nga si Zyra.
Kalit lang nilagubo ug niabli ang pultahan sa lawak ni Ramirez ug nisulod ang upat ka nag-bonnet nga mga armadong tawo.
Pagsulod niini giingong dali nga nanago sa pansayan si Ramirez ug Zyra samtang ang jail officer gipahapa ug gidisarmahan.
“Si mayor may gibanatan og rak-rak, wala ra apila si Zyra,” sigun sa jail officer.
Walay singko minutos nanibat ang mga suspek armado ug gidala pa ang cellphone sa usa sa mga nurse ug ang service firearm ni Pableo nga kalibre .9mm.
Drug related?
Ang hepe sa kapolisan sa Medellin nga si Police Major Audie Pelayo nagkanayon nga lakip sa anggulo nga ilang gitan-aw mao ang kalambigitan sa ilegal nga drugas ni Ramirez.
Kahinumduman nga gibutyag sa kanhi direktor sa Police Regional Office-7, Police Brigadier General Jose Mario Espino, nga nalakip si Ramirez sa drug watch list diin usa kini ka high value target apan una na kining gihimakak sa kanhi mayor.
Matud pa ni Pelayo nga wala hinuon silay napalgang drugas sulod sa lawak ni Ramirez sa hospital apan aduna silay napalgang tooter nga gituohang gigamit sa pagsuyop og ginadiling drugas.
Si Ramirez gisikop atol sa pagsilbi og search warrant niadtong Hulyo 26, 2017 diin siya nakuhaan og klase-klaseng mga armas hinungdan sa iyang pagka-priso.
Nunot sa medical condition niini, gitugotan siya sa korte nga i-hospital arrest.
Matud ni BJMP Medellin warden, Jail Superintendent Gil Inopia Jr., nga base sa medical certificate ni Ramirez, aduna kini hypertension ug diabetes.
SITG umolon
Sa laing bahin, ang Cebu Provincial Police Office moumol og Special Investigation Task Group nga motutok sa imbestigasyon sa pagpatay kang Ramirez.
Sigun sa tigpamaba sa CPPO, Police Lieutenant Colonel Eloveo Marquez, nga makig-alayon sila sa BJMP sa imbestigasyon.
Si Inopia nagkanayon nga internal investigation ra ang ilang buhaton ug ang polis na maoy bahala sa imbestigasyon sa kaso.
Samtang gikondenar ni Gobernador Hilario Davide III ang pagpatay kang Ramirez bisan dili sila kaalyado sa politika.
Nanghinaut si Davide nga mahatagan og kasulbaran sa kapolisan ang kamatayon ni Ramirez ug masikop ang mga responsable sa krimen.
Lakip sa nasubo sa gidangatan ni Ramirez ang simbahan sanglit nagpadayon pa ang pag-ampo sa Oratio Imperata aron mahunong na ang mga pagpamatay.
Matud ni Msgr. Camilo Alia, team moderator sa Archdiocesan Shrine of Saint Michael Archangel, ug umaabot nga team moderator sa Cebu Metropolitan Cathedral, nga ang nahitabo nga pagpusil ni Ramirez sulod sa tambalanan makapasubo tungod kay ang maong lugar usa unta sa angayan nga hatagan og pagrespeto.
Gitug-an ni Alia nga nawala na ang sagrado nga lugar o luwas nga dapit nga angayan unta respetohan kay aduna may makalas human pamusilon. (Romeo T. Limpangog, Le Phyllis F. Antojado ug Rowena D. Capistrano/GMR)(BANAT NEWS)