CEBU, Philippines – Trabahante og septic tank services, gipusil-patay sa nagpakaaron-ingnong kliyente sa may Vista Grande, Brgy. Bulacao, Dakbayan sa Talisay niadtong Lunes sa buntag. Gitawagan lang aron patyon ang tigkolekta og hugaw sa tawo ang 35-anyos nga si Eddieboy Ortega, taga Brgy. Pooc sa nahisgutang siyudad sa wala mailhing tawo nga nagsakay og motorsiklo nga nagsul-ob og itom nga senina ug purol.
Ang kauban nga maoy nakakita sa hitabo, maoy mitug-an ngadto sa kapolisan sa nahitabo sa biktima. Kini misaysay nga adunay mitawag kanila aron magpahabwa sa ilang septic tank.
Ilang giadto ang lugar samtang nagsakay og motorsiklo diin si Ortega maoy nagmaneho.
Pag-abot nila sa nahisgutang lugar, mibunlot og armas ang tawong nanawag kanila ug gipakanaug ang testigo ug gipahapa. Asoy sa testigo nga sagunson nga butobuto ang iyang nadunggan ug sa iyang pagsuta, nahagba ang iyang kauban.
Suway pang gidala sa tambalanan ang biktima apan nakabsan gyud kini sa iyang kinabuhi. Ang mga nirespondeng polis nakakita og usa ka slug ug duha ka empty shell sa crime scene.
Ang hepe sa Talisay City Police Station nga si Police Lt. Col. Marlu Conag miingon nga blangko pa sila sa motibo sa krimen ingon man sa responsable sa pagpamusil. (Camille L. Pateres/DILT)(BANAT NEWS)