CEBU, Philippines — Molampos matod pa ang usa ka tawo kun makahibalo kini unsa gyud ang tumong sa iyang kinabuhi, ug kun magpakita kini og determinasyon sa pagkab-ot sa iyang mga pangandoy. Ang tinud-anay nga kalamposan, dili matod pa masukod kun unsa ka daghan ang imong salapi, kundili, unsa kamaayo imong kasing-kasing.
Bisan pa man sa kataas na sa iyang nakab-ot nga kalamposan, nagpabiling maayo’ng tawo si Roy Adorna Gilbuela ngadto sa uban. Ang 34 anyos nga si Roy kay mao’y founder ug CEO sa sikat nga kompanya sa nasud nga Bachelors Realty & Brokerage, Inc.
Lumad siya nga taga Bantayan Island, Cebu ug kamaguwangan sa pito ka managsuon sa master cutter nga amahan ug wala’y trabaho nga inahan.
Lab-as pa sa panumduman ni Roy ang ilang pait nga kasinatian kaniadto sa bata pa diin ilang amahan lang ang nangita’g pagkaon para nilang tanan, ug nagpuyo lang sila sa balay nga wala’y kuryente.
Nagtungha siya sa elementarya sa Kabac Elementary School ug Bantayan Southern Institute sa hayiskul. Apan naabot ang dakong pagsulay sa ilang kinabuhi pagka second year high school niya diin nasakit iyang amahan ug naparalisado ang lawas niini. Gumikan niini, wala na kini nakatrabaho ug nakasinati sila og hilabihang kalisdanan. Busa, gikan sa pribadong tunghaan, nabalhin siya sa Madridejos National High School pagka-fourth year na niya sanglit dili na man sila makabayad sa matrikula.
Ug aron aduna siya’y pambalon ug makapalit sila og bugas, nagtrabaho si Roy sa iyang uyoan. Taliwala sa pagsulay, nigradwar gyud siya sa hayiskul.
Nihangyo siya sa iyang iyaan nga paeskwelahon og kolehiyo sa kursong civil engineering. Apan wala kini nisugot kay buot niining mokuha siya og kursong electrical engineering. Nagdumili niini aduna man siya’y phobia sa kuryente human nakuryentehan sa bata pa.
Busa nisulod nalang siya isip seminarian sa Rogationist of the Heart of Jesus dinhi sa dakbayan sa Sugbo. Nagduha-duha siya sa sinugdanan kay lagi siya man ang kamaguwangan’g anak ug kun modayon siya wala na’y makatabang sa iyang inahan sa pagbuhi sa iyang mga manghod. Apan tungod sa pagbulig sa iyang amahan, nidayon siya.
Gibaligya ni papa ang usa ka baka para lang gyud makasuporta sa akong pagsulod sa seminary,”paambit pa niini sa online show sa Banat News Facebook page nga mao ang MARKado.
Apan subo man nga pamalandungon, duha ka tuig gikan sa iyang pagsulod sa seminary, namatay ang iyang amahan. Ug human sa upat ka tuig sa sulod, namugos siya sa ilang spiritual director nga mogawas na gyud aron maatiman niya ang nagkamang sa kalisod nga pamilya.
“The main reason kay nagself-pity ko sa akong mga manghod, akong mama. Si mama mangayo nalang pirme og bugas sa akong mga paryente,”niya pa.
Paggawas niya sa seminaryo niadtong 2006, nakatrabaho siya isip service crew sa usa ka fast food chain. Sa susamang tuig nakaila niya si Jhoan, kinsa asawa na niya karon.
“Maghugas ko’g plato, maghuna-huna ko how to be a millionaire. I don’t want to die poor,”hinumdum pa niya.
Sa nagtrabaho pa siya isip service crew, nagpuyo lang siya sa usa ka boarding house diin unom sila sa usa ka kwarto.
“Manimaho pa na’g beer, sigarilyo, but I have no choice, I have to survive,”asoy pa niya.
Matag gawas niya gikan sa trabaho kay makakita matod pa siya og mga tawo sa mga coffee shops nga maglingkod ug maggamit og laptop ug mag-inom og kape.
“Niana ko sa akong self nga someday I will be like that,”niya pa.
Paghuman sa iyang kontrata, niundang siya pagka-service crew ug nibalhin og laing kompanya. Wala ra sab siya nagdugay dinhi ug nalanding sa bisan unsa nalang nga trabaho sama sa pag-apil og networking ug pagpamaligya og insurance.
Hangtod nga niabot ang panahon nga tulo ka bulan siya’ng wala’y trabaho. Niining panahona, namalandong siya unsa gyud iyang plano sa kinabuhi. Hangtod nga niadtong Oktobre 2009, nadani siya og trabaho sa usa ka real estate company.
“When I saw the brochure sa house, I wish I will have this house. It’s not hard to sell the product if ganahan ka sa product. Mao ni rason nga nakahukom ko nga moapil,”niya pa.
Apan dili sayon iyang pagsugod sa maong trabaho sanglit wala man gyud siya makahalin. Gani, aron mabuhi, nanghuwam lang siya og P3,500 sa iyang higala para ipalit niya og siomai og ibaligya sa iyang boarding house.
“Just for me to survive, para naa koy pamlite ug pagkaon. Three weeks ko wa’y halin, two times a day lang ko makakaon,”niya pa. Human sa tulo ka semana, nakahalin siya ug unom ka balay sulod sa usa lang ka adlaw ug mao na kini ang sinugdanan sa pagduyog sa swerte kaniya.
Nagkadako ang iyang kita kay nagkadaghan man iyang nabaligya nga balay. Hangtod nga nihukom siya nga magkinaugalingon na lang og pamaligya og balay.
Apan paghawa niya sa kompaniya, nisunod sab pag-resign ang kapin 300 niya ka mga ahente didto. Tungod niini, nakahukom siya nga magtukod og kaugalingon nga kompanya.
“Niana ko nila nga mokuyog mo nako nga wala paman ko’y kaugalingon nga opisina? Niana sila nga: ‘sir magpaabot mi kanus-a ka makaopisina’,”niya pa.
Ug tulo ka adlaw ang nilabay gikan sa iyang pag-resign, natukod niya ang Bachelors Realty and Brokerage Inc. niadtong 2013. Daghang pagsulay iyang nasugatan sa pagtukod sa kompanya.
“Ang struggle kay financial matter. We only utilize our boarding house as our office, our agents just squat and wa mi chairs,”niya pa.
Lima ka bulan ang nilabay gikan sa ilang pag-abli, nakaangkon na gyud sila og tarong nga opisina. Pilay estorya, nisikat iyang kompaniya ug nagkadaghan ang iyang mga kliyente.
Tulo ka tuig ang nilabay kay niabli siya og laing duha ka mga branches. Ug human sa tulo ka tuig kay niabli na sab ilang kompanya og laing 16 ka mga branches nationwide.
Pagka-karon, aduna na sila’y 19 branches ug 13,892 agents tibuok kalibutan.
“What happens in our company right now goes beyond our expectation. The company cannot grow without God’s grace. Everytime I go to a prayer room, I do not ask God anything, what I ask from Him is wisdom and to accept whatever good things that I’ve done,”pamunto pa niini.
Gipaambit ni Roy nga giisip niyang inspirasyon niining tanan nga kalamposan mao ang iyang amahan.
Giisip sab niyang sekreto sa iyang kalamposan mao nga: “No need for you to be smart, just work smartly. Kung mamaligya ka’g butang, makahibalo ka unsa imong gibaligya. Try to discover your purpose. Success matters on how great your determination is,”niya pa.
Sa kadaghan na nga tropeyo nga naangkon sa iyang kompanya, giisip niyang labing nga pasidungog mao matod pa ang iyang mga ahente mismo, kinsa niasenso ang kinabuhi karon tungod sa pagtrabaho sa iyang kompanya.
Taliwala sa kalamposan nga nakab-ot ni Roy karon, mas gihatagan gihapon niya og gibug-aton ang ma-ayong kasing-kasing kaysa sa material nga butang dinhi sa kalibutan.
“You can be successful once you reached whatever dream that you plot, but you have to remain the goodness of your heart. Don’t ever consider yourself successful having billions of income, but losing your good place in heaven. Protect your heart not your bank account.”