CEBU, Philippines – Usa ka 28-anyos nga drayber ang nakabangga human kini nakatagpilaw samtang nag-drive sa Barangay Tambo, Samboan alas 7:45 sa buntag, Biyernes. Nailhan ang lalaki nga si Giovan Ampon Carmona, taga Oslob ug ang iyang nabangga mao ang duha ka motor.
Ang mga biktima mao sila si Michael Rusiana, nga nagdala sa Suzuki Smash nga motor, ug si Maria Ann Romulo, 21, apil niini ang iyang backrider nga si Renelyn Romulo nga nagsakay sa Kawasaki nga motor.
Sigon sa inisyal nga imbestigasyon sa Samboan Police Station, nagsubay si Carmona sa dalan duol sa Barangay Tambo gikan sa San Sebastian sa Samboan luwan sa iyang awto sa dihang nakatagpilaw kini ug nisubay na hinuon sa pikas linya.
Nakamata na lang kini siya dihang nilagubo iyang sakyanan human niya mabanggai ang naa sa pikas lane. Si Police Master Sergeant Johnny Marquino, miasoy sa Banat News nga gidala sa hospital ang mga biktima apil si Carmona.
Si Carmona gidala sa Samboan Rural Health Center tungod dili ra kini grabe samtang ang duha ka Romulo gidala sa Oslob District Hospital, ug si Rusiana didto sa Malabuyoc District Hospital kay maoy nagrabehan.
Tungod sa kahimtang ni Rusiana gidala kini ngadto sa Negros Oriental Provincial Hospital sa Dumaguete City apan giingong alas 11:09 sa buntag nabugtoan kini sa iyang kinabuhi. (Rowena Capistrano/IBM)(BANAT NEWS)