CCENRO ni-require og mist spraying sa mga basura

CEBU, Philippines – Ang Cebu City Environment and Natural Resources Office (CCENRO) ni-require  sa ARN Central Waste Management Inc. nga mo-spray og mist sa nagbundo nga basura ug paglimpiyo sa heavy equipment diha sa landfill sa Barangay Binaliw aron malikayan ang pag-alisngaw sa baho.

Ang CCENRO nigama sa maong lakang human sa gipahigayong inspection diha sa 10-hectare landfill site niadtong Lunes human sa mga reklamo sa residente diha sa lugar kabahin sa kabaho gikan sa landfill.

Ang inspection gipangulohan ni Nida Cabrera, hepe sa CCENRO kinsa nibutyag nga nag-require sila og mist spraying ug paghugas sa sakyanan inig gawas niini gikan sa landfill.

Gipasabot ni Cabrera nga ang mist spraying susama sa deodorizer ug ang interval sa utilization niini adjustable.

“Mechanized ang misting, i-set lang ang intervals para naay regular spraying”, matud ni Cabrera. Kahinumduman nga 500 ka residente sa Barangay Binaliw ang niapil sa signature campaign aron ipahunong ang operasyon sa landfill niadtong Sabado.

Matud ni Cabrera nga ang iyang buhatan regular nga nag-monitor sa operasyon aron masiguro nga ang ARN nituman sa tanang existing environmental laws. Sayo pa, ang ARN Central Waste Management Inc. nipasabot nga ang baho gumikan kini sa kapin usa ka semana na nga basura hinungdan nga gidoble nila ang dosage sa pag-spray og deodorizer sa nagbundo nga basura aron pagwagtang sa baho.

Ang maong basura gikan sa private hauler kinsa ni-utilize sa private-owned landfill sa Lungsod sa Consolacion nga temporaryong unavailable sa dumping. Gipasalamatan nila ang mga residente sa pagpadangat sa ilang concern apan mihangyo nga sabton usab sila sanglit niakumodar lang sila og private hauler alang sa solid waste disposal. (/BDB)(BANAT NEWS)