CEBU, Philippines — Usa ang patay sa nahitabong panagbangga sa kadalanan sa Lungsod sa Argao kagahapon sa kaadlawon.
Sa Brgy. Talaga, patay diha-diha dayon ang 30-anyos nga biktima nga si Ramonito Villamor Rollon, ulitawo, taga Brgy. Cabancalan sa Dakbayan sa Mandaue.
Nagkasugat sila sa puti nga van nga Toyota Hi-Ace Grandia nga gimaneho sa 39-anyos nga si Manolit Rama Arisala, taga Banawa Brgy. Guadalupe, Dakbayan sa Sugbo.
Sa inisyal nga imbestigasyon sa kapolisan, si Rollon nagmaneho sa iyang pink nga Suzuki Smash nga motorsiklo paingon sa amihanan samtang si Arisala nagbiyahe paingon sa Oslob.
Matud ni Police Staff Sergeant Howard Maniyopa sa Argao Police Station, mikawat og lane si Arisala apan pag-abot sa kurbadahong bahin nagkasugat sila ni Rollon nga maoy hinungdan sa ilang panagbangga.
Gidakop sa kapolisan si Arisala tungod sa kasong reckless imprudence resulting to homicide.
Apan kon dili mopasaka og kaso ang kabanay sa namatay, hayan buhian nila kini human sa reglementary period karong Lunes.
Panawagan sa polis ngadto sa mga drayber ug biyahedor nga magmatngon kanunay sa ilang pagbiyahe aron malikay sa disgrasya. (Rowena D. Capistrano/DILT)(BANATNEWS)