Balota para sa Bohol nasaag sa Cordova

CEBU, Philippines – Moabot 120 ka balota nga alang unta sa lungsod sa Albuquerque sa lalawigan Bohol ang nadala didto sa Cordova sumala sa election officer sa Comelec Central Visayas nga si Atty. Veronico Petalcorin.

Matud ni Petalcorin nga pasado alas 10 nadawat nila ang taho adunay nasaag nga balota didto sa Cordova.

Ang maong mga balota alang sa Barangay Toril sa Albuquerue apan didto napunta sa Bangbang Elementary School sa Cordova.

"Pag distribute sa pito, na shade-an na, nabantayan nga dili diay (mao) karon wala to dawata sa machine (vote counting machine) so na spoil 'tong mga balota, dili to maihap," matud ni Petalcorin.

Ang nahibilin nga 113 ka balota daling gipadala ngadto sa Bohol aron magamit sa mga botante didto sa usa ka presinto sa Alburquerque.

Matud Petalcorin nga katong pito mga botante nga nahatagan og dili mao ang balota gihatagan og bag-ong balota sanglit dili man nila sala ug wala man to tuyoa ug dili pud mao ang lokal nga kandidato.

Giklaro hinuon ni Petalcorin nga wala magkulang ang balota sa Cordova ug sa Barangay Toril sa Albuquerque bisan sa nahitabo.

Matud pa niya, base sa nanglabay nga mga piniliay wala gyud mahitabo nga 100 percent ang voters turnout, diin ang gidaghanon sa mga nagparehistro mao sab ang gidaghanon sa mga nibotar atol sa piniliay.

Matud niya kasagaran matag eleksyon moabot lang og 80 porsiyento kapin ug kulang ang voters turnout.

Mao sab kini rason kun nganong dunay mga sobrang balota nga mahimong gamiton puli sa mga 'spoiled' ballots sama sa nahitabo sa Cordova ug Albuquerque. (/IBM)(BANAT NEWS)