CEBU, Philippines – Andam na ang Commission on Elections sa Lungsod sa San Fernando alang sa piniliay karong buwan sa Mayo.
Gibutyag ni Mario Oville, election supervisor sa lungsod nga miabot sa 150 kapin ug kulang ang moserbisyo sa umaabot nga eleksyon ug wala nay moatras kanila.
Matud niini nga aduna na silay kasabutan ni PSInsp. Lymel Pasquin, hepe sa kapolisan sa maong lugar nga matag voting center, bantayan og tag duha ka polis nga maoy mohatag og seguridad.
Kahinumduman nga daghang magtutudlo ang mikakak sa pagserbisyo sa piniliay gumikan sa kainit sa panagribal sa politika sa maong lungsod.
Misamot pa gyud kini gumikan sa sunod-sunod nga patay sa dapit diin nalambigit ang mga politiko.
Hinuon si Oville nagkanayon nga pabilin ra gihapon nga malinawon ang lungsod sukad nga milingkod siya isip election supervisor. Karong Mayo 2 ug 4 mao na ang katapusang briefing alang sa piniliay nga gipaabot sa kadaghanan. (/DILT)(BANAT NEWS)