CEBU, Philippines — Ang mga ekipo ug uban pang ayuda alang sa mga apektado sa huwaw sa Probinsiya sa Sugbo ang gipaabot nga ma-deliver sa supplier karong semanaha o sunod semana.
Matud ni Jone Siegfred Sepe, vice chairman sa Bids and Awards Committee (BAC) sa Kapitolyo nga sukad niadtong Abril 10 adunay tulo ka purchase request ang niabot sa ilang buhatan nga kantidad tanan og P23 milyones.
Apil niini ang P2.5 milyones nga kantidad sa stainless water tanks ug water pumps nga gi-request sa Provincial Disaster Risk Reduction and Management Office (PDRRMO).
Ang Agriculture’s Office ni-request usab kini og plastic drums, polyethylene pipes o hoses, water tanks ug water pumps nga mokabat tanan ngadto sa P9 milyones.
Matud usab ni Sepe nga ang Provincial Social Welfare and Development Office (PSWDO) ni-order og relief goods nga nagkantidad og P6.4 milyones.
Ang Kapitolyo magpalit usab og premium rice nga mokabat tanan ngadto sa P1.5 milyon. Si Sepe nagkanayon nga ang BAC niisyu na kini og purchase order alang sa pagpalit sa mga relief goods ug premium rice bags ug gipaabot nga magsugod ang delivery niini gikan sa suplier karong semanaha. Samtang ang gipangayo sa agriculture ug PDRRMO anaa pa sa canvassing.
Dugang ni Sepe nga mas dali ang pag-deliver sa mga pamaliton nga ekipo ug goods sanglit usa man kini ka emergency purchase human nga nideklarar ang probinsiya og state of calamity tungod sa huwaw. (BANAT NEWS)