CEBU, Philippines — Patay ang 21-anyos nga motorista human nagkabangga sa sports utility vehicle (SUV) sa may Brgy. Canlumacad sa Lungsod sa Santander, habagatang bahin sa Lalawigan sa Sugbo, mga alas 5:45 sa hapon niadtong Sabado Santo.
Ang namatay kinsa paingon na untang magkuha sa iyang higala, giila sa kapolisan nga si Jhonrey Pulpul, taga Brgy. Liloan sa nahsigutang lungsod. Si Pulpul nagmaneho sa iyang Rusi 100 nga motorsiklo samtang ang gikabangga niini nga Isuzu MUX gimaneho ni Mhardie Olario, 31-anyos, taga Brgy. Alang-Alang sa Dakbayan sa Mandaue.
Sumala pa sa desk officer sa Santander Police Station nga si Police Corporal Jericho Señagan nga nagsubay sa managlahi nga lane ang duha; si Olario paingon sa amihanan samtang si Pulpul paingon sa habagatan. Giingong misuway og overtake si Pulpul sa gisundang motorsiklo samtang si Olario misuway sab og overtake sa gisundang sakyanan, ug didto na nagbangga ang duha sa tunga sa dalan.
Matud ni PC Señagan nga mibangga si Pulpul sa wala nga bahin sa atubangang ligid sa sakyanan ni Olario ug nalagpot kini ug nakahiagum og grabeng samad sa iyang ulo kay wala kini magsul-ob og helmet.
Gidala pa kini sa Oslob District Hospital apan gideklarar kini nga dead on arrival ni Dr. Delfin Acoña.
“Gidakop namo ang driver (Olario). Pero after sa reglementary period kung di pa makadecide ang hingtungdan sa namatay nga pasakaan siya og kaso, amo na siya nga buhian,” sigon sa polis.
Mag-atubang og kasong reckless imprudence resulting to homicide si Olario kon makahukom ang tagtungod sa biktima nga ikiha kini. Samtang, naangol ang duha ka Indian national human ang ilang giluwanan nga sakyanan nasungag sa laing sakyanan sa may A. Soriano Ave. sa Brgy. Centro, Dakbayan sa Mandaue niadtong Biyernes Santo.
Ang mga sakop sa Traffic Traffic Management Unit sa kapolisan sa Mandaue City Police Office nga mihimo sa imbestigasyon miingon nga ang SUV ang gimaneho sa langyaw, nagdagan subay sa naasoy nga dalan ug kalit lang nabangga ngadto sa gikasugat nga laing sakyanan nga paingon sa Siyudad sa Sugbo.
Ang sakyanan nga pasaheroan nakasinati og grabeng kadaut apan ang duha ka mga langyaw maoy nakasinati og grabeng kadaut sa ilang kalawasan hinungdan nga gidala sila sa duol nga tambalanan.
Bisan sa kadaut, walay naangol nga mga pasahero ug mga crew sa pasaheroang sakyanan. (Rowena D. Capistrano ug Romeo T.Limpangog/DILT)(BANATNEWS)