CEBU, Philippines — Hugot nga bantayan sa kabomberohan sa Dakbayan sa Talisay ang tulo ka mga barangay nga matud pa maoy labing peligro nga maigo og sunog karong panahona.
Ang nahisgutang mga barangay mao ang Tabunok, Lawaan 3 ug Tanke.
Gipasabot ni Sr. Insp. Arra Alpajaro, fire marshal sa dakbayan nga ang tanang lugar o panimay delikado nga masunog apan sa tulo ka barangay nga ilang gitutokan maoy malagmit nga daling maigo og sunog gumikan kasikit sa panimay ug ka gagmay sa agianan niining mga dapita.
Matud pa ni Alpajaro nga ubos sa ilang kalihukan sa fire prevention month ilang ipatuman ang Oplan Ligtas Pamayanan. Lakip sa ilang aktibida mao ang ang pagpaduol nila ngadto sa katawhan o sa komunidad.
Niya pa, diha sa ilang paglibot sa dakbayan ilang gipasabot ug gitudluan ang mga mulopyo sa angay nga buhaton panahon nga adunay sunog, lakip na kun unsaon ang paglikay niini.
Ila sab nga giplano ang pagtukod og community fire auxilliary nga mao ang unang moresponde panahon nga adunay sunog.
Nasayran nga tulo ka mga barangay ang nakatala sa dagkong mga sunog nga nahitabo sa dakbayan.
Basi sa talaan, 11 na ka kaso sa sunog ang niulbo sa Talisay sukad niadtong Enero. (/RMB)(BANATNEWS)