Misibat sa checkpoint nakabangga, nakuhaan og kontrabando

CEBU, Philippines — Nagtingkagol sa lock-up jail ang usa ka 24-anyos nga lalaki kinsa nasikop human suway mi-eskapo sa checkpoint nga gipahigayon sa kapolisan sa Lungsod sa Compostela, sa may Purok Ipil-ipil, Brgy. Estaca niadtong Biyernes sa buntag.

Ang nasikop mao si Jeffrey Peralta, ulitawo, taga Brgy. Canamucan diin matud pa ni PO2 Roland Alo, desk officer sa Compostela Police nga samtang nagpahigayon og checkpoint ang iyang mga kauban, mibalik sa iyang agi si Peralta sakay sa iyang motorsiklo diin iyang gibanggaan si Rachel Amor, 24-anyos taga Purok Shooting Star, Brgy. Babag, Lapu-Lapu City nga nagmaneho usab sa iyang motor.

Sumala pa ni Alo, nahitabo ang ginukdanay atol sa pagbiya ni Peralta kinsa nasikop ra usab. Dihang gipahigayonan kini og body search, nakuhaan kini og usa ka homemade nga kalibre 38 nga armas nga walay serial number, upat ka buhing bala ug pito ka gagmay’ng putos sa gituohang ginadili nga drugas.

Ang dinakpan nagtingkagol na karon sa prisohan samtang giandam ang pagpasang-at og tukma nga kaso.

Samtang si Amor nagpatambal pa sa iyang naangkon nga kadaut human kini natumba dihang gidam-agan ni Peralta atol sa pagsibat niini. (/DILT)(BANATNEWS)