Ex-kagawad nanglugos og amang
CEBU, Philippines — Gitanggong karon sa detention cell sa Presinto 4 sa Lapu-Lapu City Police Office (LCPO) ang kanhi konsehal sa Brgy. Marigondon nga gipasanginlang nanglugos og 19-anyos nga dalaga nga usa ka amang.
Giila ni SPO2 Jerome Espinosa sa Presinto 4 Police Station ang suspek nga si Esmeraldo Andales, 61-anyos nga taga San Carlos Village sa nahisgutang barangay.
Matud ni SPO2 Espinosa nga gialigar sa pipila ka mga nakasaksi sa maong hitabo nga naglakaw ang biktima aron mopauli sa ilang panimalay, nalabyan kini sa suspetsado luwan sa iyang sakyanan.
Dugang sa polis nga gihunongan sa suspek ang biktima ug giagda nga pasakyon ug tuod man gidala kini ngadto sa ilang panimalay diin didto gipahimuslan ang pagkababaye niini.
Human sa hitabo ang biktima gipapauli ra usab sa suspek kinsa misumbong usab sa iyang gidangatan ngadto sa iyang mga ginikanan.
Si SPO2 Espinosa miingon nga ang biktima nga gikuyogan sa iyang ginikanan sa pagtaho sa ilang buhatan ang gidasonan usab sa pipila ka mga silingan nga maoy hinungdan nga kasong pagpanglugos ang ilang gikatakda nga ipasaka karong Lunes batok sa dinakpan. (/DILT)(BANATNEWS)
- Latest