Habalhabal driver nga midala og pasahero sa lodge, gidunggab

CEBU, Philippines — Kritikal ang kahimtang sa usa ka habalhabal drayber human siya gidunggab sa mag-uuma samtang kini naghuwat og pasahero sa Brgy. Mantalungon sa Lungsod sa Barili niadtong Huwebes sa hapon.

Ang biktima mao si Margarito Cabalida, 28-anyos, ulitawo, nagpuyo sa maong dapit. Samtang ang suspek nga usa ka mag-uuma mao si Wilfredo Mangiao, 44-anyos, minyo, taga Sayaw sa Lungsod sa Sibonga.

Matud ni PO3 Michael Villardan sa Barili Police Station nga nagpaabot og pasahero ang biktima dihang gihansakan kini og kutsilyo sa iyang buko-buko.

Tiwasan unta sa suspek ang biktima apan nakadagan kini ug nakapangayo og tabang.

Nasikop si Mangiao sa mga tanod sa lugar ug nakuha gikan niini ang kitchen knife nga iyang gigamit sa krimen.

Gidala usab sa labing duol nga tambalanan ang biktima samtang gitanggong sa bilangguan ang suspetsado.

Asoy pa ni Villardan nga napungot ang suspek sa biktima human mitug-an ang asawa niini nga dihang sakay siya sa motor sa biktima, gidala siya sa lodging house sa Dakbayan sa Carcar.

Gani kaduha na kahigayon nga gidala ang asawa sa suspek sa maong lugar ug nakuha sab ang pagkababaye niini.

Nasayran nga ang asawa sa suspek usa ka tindera og utanon sa Mantalungon.

Gikatakdang pasakaan og kaso ang suspek gumikan sa iyang nabuhat nga krimen. (/DILT)(BANATNEWS)