CEBU, Philippines – Ang Hugpong ng Pagbabago (HnP), regional party ni Davao City Mayor Sara Duterte mopahigayon og caravan sa International Eucharistic Convention Center ugma sa hapon.
Kagahapon, si Cebu City Councilor Raymond Alvin Garcia mipahibalo nga ang HnP nga gipangulohan ni Sara, moanhi sa Sugbo sa pagpaila sa senatorial candidates ubos sa iyang partido. Aduna’y 13 ka kandidato ang HnP alang sa pagka senador nga sila si senador Sonny Angara, Cynthia Villar, Aquilino “Koko” Pimentel III, ug Joseph Victor “JV” Ejercito; Ilocos Norte Governor Imee Marcos; kanhi Presidential Assistant Bong Go; ang mga kanhi senador nga sila si Jose “Jinggoy” Estrada ug Bong Revilla; Deputy Speaker ug Taguig City-Pateros 2nd district representative Pia Cayetano; kanhi PNP chief Ronald “Bato” dela Rosa; Maguindanao Representative Zajid Mangudadatu; kanhi Presidential political adviser Francis Tolentino, ug kanhi veteran broadcast journalist Jiggy Manicad.
Ang maong kalihukan magsugod sa alas dos sa hapon diin gibana-bana nga matapos sa alas siete sa gabii ug gilauman nga mohatag og mensahe ang mga kandidato.
Dugang ni Garcia nga si Sara mo-endorso sa tibuok slate sa Partido-Barug nga gipangulohan ni mayoralty candidate, Vice Mayor Edgardo Labella. Ang endorsement ni Sara makahimo sa pagpalambo sa kandidatura sa mga kandidato ubos sa Partido-Barug alang sa umaabot nga piniliay sa Mayo. “Of course, it will boost the candidacy of Partido-Barug candidates most especially our mayoralty candidate,” sumala pa niya. Si Labella miingon nga nagdepende kang Sara kon isaka ang ilang mga kamot atol sa kalihukan.
Siya midugang nga ang Partido-Barug kaalyado sa HnP nga gimugna ni Sara. (/DILT) (BANAT NEWS)