Duha ka negosyante gipusil patay sa riding-in-tandem

CEBU, Philippines — Patay ang duha ka negosyante nga biktima sa pagpamusil  sa managlahing dapit sa Dakbayan  sa Lapu-Lapu alas 7 pasado ang takna sa gabii  sa miaging Domingo.

Si Police Officer 2 Luisito Ernie sa Homicide Section sa Lapu-Lapu City  Police Office (LLCPO) miila sa unang biktima nga mao si Samson Go  Jr., 47, tag-iya og tindahan sa bugas sa merkado publiko sa Barangay Poblacion sa maong dakbayan.

Matud pa ni Ernie nga padulong na ang biktima pauli sa ilang panimalay sakay sa iyang sakyanan apan pag-abot sa New Road, Barangay  Looc gitaparan kini og nag-motor ug ang angkas nipaulan og bala sa biktima dayong bulhot palayo. Ang mga sakop sa Philippine Red Cross  nidala sa biktima sa tambalanan apan gideklarar kini nga dead on arrival.

Laing pagpamusil sa mao gihapong oras ang nahitabo sa Sitio Kagudoy,  Barangay  Basak diin ang biktima  giila nga mao si Jose Barrientos, 68 , nagpuyo sa maong dapit.

Matud pa ni Ernie  nagsakay sa iyang sakyanan ang biktima dihang kalit gipaulanan og bala sa riding-in-tandem.

Nakuha sa crime scene ang duha ka mga cellphone sa biktima, duha ka basiyo sa mga bala  ug  deformed slug nga gituohang gikan sa armas sa mga mamumuno. Padayon pa ang imbestigasyon sa kapolisan kabahin sa hitabo. (BANAT NEWS)