CEBU, Philippines – Hingpit nga gipasirado sa kagamhanan sa Dakbayan sa Mandaue ang operasyon sa Big Hotel nga nahimutang sa Mantawi Road, Barangay Tipolo.
Ang pagsirado nga gihimo alas 9:56 kagahapon sa buntag, natigayon pinaagi sa giluwatan nga closure order ni Mayor Luigi Quisumbing tungod sa nakita nga kakulian sa ilang dokumento nga nagtugot sa mga nagdumala sa ilang operasyon.
Unang gitak-upan ang Linear Coffee nga nahimutang sa sulod sa Big Hotel nga nahimutang usab atbang sa Parkmall.
Gisunod sa pagtak-up ang Big Hotel Suites nga nahimutang sa buwag nga dapit sa mao gihapong lugar.
Ang City Legal Office sa dakbayan maoy nagpatuman sa kamanduan ni Mayor Quisumbing nga ang hinungdan mao ang wala pagbaton og business permit kay ang ilang pag-ukopar sa maong luna gikan pa sa Katumanan Hardware.
Si Atty. Elaine Bathan nga maoy executive secretary sa mayor mipasabot nga ilang gihatagan og taas nga lugway ang maong mga etablisamento nga ubos sa Cenore Corporation.
Matud ni Bathan nga ang Cenore Corporation nga maoy nanag-iya sa maong mga establisamento, nakigkontrata sa Katumanan Hardware.
Ang Katumanan Hardware maoy nag-abang sa maong luna nga kapin sa 1.5 ka ektarya nga gipanag-iya sa kagamhanan sa dakbayan sa kantidad nga P12 matag metro kuwadrado sulod sa 25 ka tuig.
Gitataw ni Bathan nga ilegal ang pag-ukopar sa Cenore Corporation.
Midugang kini nga ilang giawhag ang kadagkuan sa maong korporasyon sa paghimo og laing kontrata ngadto sa kagamhanan apan nagdumili kini nga maoy hinungdan nga ilang gipatuman ang pagpasirado sa ilang establisemento. (/DILT)(BANAT NEWS)