CEBU, Philippines — Gitinguha ni Ilocos Norte Gov. Imee Marcos nga ma-institutionalized sa tibuok nasud ang anti-discrimination ordinances nga napasar sa mga tagsa-tagsa ka mga local government units.
Si Marcos kinsa nakigkita sa mga lider sa LGBTs uban sa mga kababayen-an ug mga senior citizens sa Barangay Capitol Site sa Dakbayan sa Sugbo kagahapon nagkanayon nga daghan nang mga ordinansa nga proteksyon sa mga LGBTs sa nagkadaiyang mga LGUs apan wala gyuy nasudnong balaod alang kanila.
Dinhi sa Dakbayan sa Sugbo aduna nay City Ordinance No. 2339 o ang”An Ordinance Prohibiting Discrimination in the City of Cebu on the Basis of Disability, Age, Health Status, Sexual Orientation, Gender Identity, Ethnicity and Religion.”
Gitumong kini aron maproteksyonan ang katungod sa tanang mga molupyo sa dakbayan bisan unsa pa ang ilang estado. Ang dakbayan maoy labing unang siyudad sa Pilipinas nga nipasar og susamang ordinansa.
Pinaagi sa maong ordinansa, gidasig ang mga Lesbian, Gay, Bisexual and Transgender (LGBT) community nga mohimo og nagkadaiyang kalihokan ug adbokasiya.
“Andami-dami nga mga ordinances against discrimination of gays, and LGBTQ but until now wala pang national. So let’s move on that and I hope that all LGBTQ groups can get together finally,” matud pang Marcos.
Ang grupo sa mga LGBTs dinhi sa Sugbo malaumon suportahan sa ilang pundok ang gobernador sa Ilocos Norte.
“We invited the LGBTs, senior citizens and the women dinhi to know more about Marcos. Ang target namo diri sa Cebu is to introduce Imee Marcos to the milennials and LGBT dinhi,” si Lee dela Cerna nagkanayon.
Gawas sa pakigsandurot sa mga tawo, nangapud-apod usab ang grupo og mga bugas sa mga nanambong. IBM (FREEMAN)