CEBU, Philippines — Gilauman nga ang mga interesadong bidders mosumetir sa ilang bidding documents sa procurement sa aggregates ug bitumen alang sa asphalting projects sa Department of Engineering and Public Works (DEPW) nga nagkantidad og P100 million karong adlawa.
Ang Cebu City Bids and Awards Committee(BAC) opisyal nga mibukas sa ikaduhang bidding alang sa procurement sa filling materials sa aspalto karong adlawa sa 7th floor sa City Hall building.
Ang pangulo sa BAC nga si Ronaldo Malacora miingon nga ang unang gitakda nga bidding napakyas kay wala’y mga supplier nga mipatim-aw.
“No interested supplier, usually basta beginning of the year, kasagaran sa supplier dili ka participate sa bidding kay mag-renew sila sa documents”, matud ni Malacora.
Nanghinaot siya nga dunay mga bidders nga moapil sa public bidding karon aron makapadayon sila sa evaluation sa ilang bidding documents.
Sigon ni Malacora ang lowest bidder dili basehanan sa pag-deklarar nga winning bidder sanglit susihon gyud nila og maayo ang bidding documents subay na sa procurement laws.
Dunay tulo ka klase sa dokumento nga tan-awon sa Technical Working Group (TWG) kini naglangkob sa legal, technical ug financial.
Asoy ni Malacora, ang procurement sa aggregates ug bitumen gitagana alang sa asphalting project sa DEPW karong tuiga.
Ang P100 million adto gikuha sa approved budget sa DEPW karong tuiga.
Giingong daghang dapit sa siyudad ang kinahanglan og asphalting repair. — LPM (BANAT NEWS)