Mga tanod sa 9 ka barangay nakadawat og honoraria

CEBU, Philippines – Nakadawat kaga-hapon ang mga tanod sa siyam ka mga barangay sa Siyudad sa Sugbo sa ilang honoraria matud pa sa pangulo sa Cebu City Office for Substance Abuse Prevention (COSAP).

Gipadayag ni Garry Lao, pangulo sa COSAP nga ang buwan sa Nobyimbre ug Disyembre sa miaging tuig nalang nga honoraria ang wala madawat sa maong mga barangay tanod.

Sa buwan sa Nobyimbre, ang mga tanod sa Barangay Babag, Mabini ug Poblacion Pardo ang nakadawat sa ilang honoraria. Samtang ang mga tanod sa Barangay Bonbon, Buot, Kamputhaw, Bo. Luz, Pahina Central ug Toong ang nakadawat sab sa ilang honoraria niadtong Disyembre. “Naay makadawat og doble kay naa may November ug December. So, P8, 000 ilang madawat. So daghan tanan makadawat adto sa City Treasurer’s Office”, matud ni Lao. Nasayran nga ang mga tanod magdawatan og P4,000 nga honoraria gikan sa kagamhanan sa siyudad.

Subay niini, sigon ni Lao nga sa buwan sa Enero, 36 pa ka mga barangay ang nakahatag sa ilang buhatan sa mga rekisitos nga gipangayo aron ang honoraria sa mga tanod maproseso.

“Sa January nato so far 36 pa lang kabuok ang naka-submit. Pero naa na ron sa accounting. Kay 36 pa man sad naka submit sad amoa. So, first-come-first-serve (basis) gihapon kon kinsay maka-process. So, sila sad, atong i-process dayon.”, dugang ni Lao. (/DILT)(BANAT NEWS)