CEBU, Philippines — Hilabihan ang gibati nga kahinangop sa mga opisyal sa lokal nga kagamhanan sa Lungsod sa Consolacion human maangkon ang kadaugan sa ilang contingent nga Tribu Malipayon atol sa Sinulog Grand Parade ubos sa Free Interpretation category.
Si Mayor Teresa Alegado mipadayag sa iyang kalipay ug miingon nga nagbunga gayod og maayo ang mga kahago sa pagpraktis sa pagsayaw og Sinulog.
Ang Tribu Malipayon unang milangkat og kadaugan atol sa Sinulog sa Kabataan sa Lalawigan niadtong Enero 12 diin ilang nakuha ang ikatulong dapit..
Nasayran nga gilangkuban ang ilang mga mananayaw sa mga tinun-an sa Pulpogan National High School, Consolacion National High School ug Tayud National High School ug ang mga sakop sa Alpha Kappa Rho Consolacion Chapter maoy nagsilbi nilang mga propsmen.
Matud ni Alegado nga wala siya magdahum nga maangkon nila ang unang ganti atol sa grand parade ug gani iyang gitataw nga igo lang silang mihalad ngadto sa Balaang Bata isip pagpasalamat sa daghang grasya nga ilang naangkon sa miaging tuig.
Nunot niini gipasalamat ni Mayor Alegado ang tanang nakatampo sa ilang kadaugan, ilabi na sa mga dancer, propsmen, instrumentalists ug ang mga ginikanan ug magtutudlo.
Sa mao nilang kadaugan isip kampiyon, ilang naangkon ang usa ka milyon ka pesos ug laing P200 mil human nahimong runner-up sa Best in Costume ug Musicality. (BANAT NEWS)