Simbahan dili moendorso og kandidato
CEBU, Philippines – Si Archbishop Jose Palma sa Archdiocese of Cebu subling niklaro nga dili sila mopahibalo sa publiko kinsa nga kandidato ang ilang suportahan niining nagsingabot nga eleksiyon.
Kini tungod kay silang mga anaa sa simbahan igo lang mohatag og giya sa mga magtutuo sa ilang mga personal choice ug dili aron sa pag-impluwensiya.
Gipaambit ni Palma nga bisan kaniadto nga batan-on pa siya nga pari kanunay niyang gipahinumdum nga ang politika alang lang kini sa mga politiko hinungdan nga dili siya mopadayag diha sa publiko sa iyahang suportahan nga politiko.
Matud ni Palma nga wala sila’y public campaign nga buhaton tungod kay iyang gihatagan ang publiko nga maghuna-huna ug mamalandong kong kinsa nga politiko ang ilang nakita nga mohatag og maayong serbisyo sa kumunidad.
Awhag ni Palma sa mga magtutuo nga mag-ampo alang sa patas, matinud-anon ug limpiyo nga eleksiyon ug mag-ampo usab nga mahatagan sila og giya atol sa ilang pagboto.
Si Palma niluwat sa maong pamahayag human nasinati ang presensiya sa mga politiko kinsa buot magpapili sa umaabot nga eleksiyon karong Mayo.
Si Palma malaumon nga balaanon gihapon sa mga politiko ang relihiyoso ug cultural nga kalihukan ilabi na sa kapistahan ni Senior Santo Niño. (/BDB)(BANAT NEWS)
- Latest