CEBU, Philippines – Gipahibawo sa Philippine Coast Guard sa rehiyon ang mga tag-iya og panagatan ug sakayan nga buot moapil sa fluvial procession karong Sabado, Enero 19 nga kutob nalang karong Huwebes ang ilang pagpanawat sa rehistrasyon.
Ang tigpamaba sa PCG-7 nga si Lieutenant Junior Grade Michael John Encina mipadayag nga hangtod niining pagtaho, lima pa ang mipadayag nga mosalmot sa fluvial procession.
Libre ang registration mao nga giawhag ni Encina, nga kon buot magparehistro, molukat una og special permit sa MARINA-7 ug moadto sa Coast Guard Sub-station. Kini aron sab mapahiluna kon asa nga division atol sa fluvial.
Pahimangno ni Encina nga atol sa fluvial procession, gidili ang pagpalupad og balloon ug drone, gidili ang pag-inom og ilimnong makahubog ug mas maayo nga dili magdala og gamay nga bata. Adunay mag-istambay nga ambulansiya gikan Pier 1 padung Pier 5 ug aduna usab silay mga floating assets nga maoy padaganon panahon sa emerhensiyaDugang pahimangno ni Encina nga motuman kon unsay ilang lagda aron magpabilin ang kahapsay ug kalinaw sa fluvial procession.
Subay niini, nangandam na sab sa ilang contingency plan ang PCG tungod sa hulga sa pagsulod sa bagyo karong Sabado.
Si Encina nagkanayon nga kon adunay weather disturbance, dili na patuyukon sa Pasil area ang galleon nga kargahan sa mga imahen ug idiretso na kini sa Pier 1 gikan sa Muelle Osmeña Wharf. Apan kon adunay tropical typhoon signal ila gyud ikanselar ang fluvial procession kay ang seguridad sa tanan ang ilang gisiguro. Sa pagkakaron, padayon ang ilang monitoring sa kahimtang sa panahon.
Hinuon matud sa tigpamaba sa PCG nga ang Mactan Channel usa ka special area kay gilibutan kini og isla diin dili kaayo maapektuhan kon adunay tropical depression. (Joevelon G. Pinay /DILT)(BANAT NEWS)