CEBU, Philippines — Bagang duot sa mga manimbahay ang mihugop sa unang adlaw sa Misa de Gallo sa St. Arnold Jansen sa may Alumnos, Brgy. Basak San Nicolas, Dakbayan sa Sugbo kagahapon sa kadlawon diin gipahinumduman ni Fr. Andres “Andy” Guban, SVD ang katawhan nga bisan sa daghang hagit ug mga pagsuway sa kinabuhi padayon gihapon mosalig sa tulo ka mga pulong.
Mga pulong nga nag-aghat nga ipadayon ang pagsalig ngadto sa Ginoo ilabi na ngadto sa mga kabatan-onan diin gipahinungod ngadto karong tuiga isip mga beloved, gifted, ug empowered, diin padayon sila nga ilakip sa mga pag-ampo ilabi na daghan kanila ang nagsalig na sa butang kalibutanon.
Sumala pa ni Guban, kinahanglan usab ang katawhan nga maglipay bisan sa mga kabalaka ug kahingawa kay ang tinuoray nga kalipay dili makita sa mga materyal nga mga butang sanglit ang tinuod nga kalipay anaa sulod sa kasingkasing.
Giawhag usab ni Guban ang mga magtutuo sa ikatulo nga pulong mao ang pagbuhat og maayo ilabi na ngadto sa mga tawo nga mas labing nanginahanglan. (Rowena D. Capistrano/DILT)
Pagtabang sa mga mas nangina-
hanglan pakusgan
Dugang mga charity works ang gitinguha karon sa mga sakop sa Talisay Sugbo Masonic Lodge sunod tuig human sa ilang gipahigayon nga tinuig nga Christmas party niadtong Sabado sa gabii.
Ang Talisay Sugbo Masonic Lodge gilangkuban kini sa mga Freemasons nga mga abogado, PNP-AFP-BJMP-Fire, Customs officials, negosyante ug uban pa gikan sa nagkadaiyang hut-ong sa katilingban nga gipangulohan ni Worshipful Master James Alesna, Senior Executive Staff sa Office of the Governor.
Matud pa ni Atty. Rey Gealon, sakop sa maong grupo nga atol sa ilang tinuig nga tigum mas palapdan pa nila ang daghang charity works sunod tuig diin lakip ang Banhaw Foundation usa ka institusyon alang sa mga gi-abusohan nga kabataan maoy usa sa ilang gisagop alang sa ilang school supply, scholarship, medical needs ug uban pa.
Sumala pa ni Gealon lakip sa ilang tinguha sunod tuig mao ang pagpanghatag og tambal ug vitamins sa mga bata, dental ug medical mission ingon man pag-apod-apod pa og scholarships.
Tinguha sa maong grupo nga daghan pa ang makatagamtam sa ilang serbisyo ilabi na ang mga mas nanginahanglan. (/DILT)(BANATNEWS)