F. Rallos St. pahawanan
CEBU, Philippines – Ang National Bureau of Investigation-7 gikatahong niawhag nga pahawanan ang aseras sa dalan F. Rallos sa Barangay Pasil nga ilegal nga giokupar sa usa ka tindahan nga namaligya og karne ug putaheng pawikan.
Niadtong adlaw nga Martes, ang NBI kauban ang Wildlife Enforcement Team sa siyudad ug ingon man sa DENR mironda sa maong tindahan diin nasakmit ang kapin 90 ka kilong karne sa pawikan ug 20 ka kilong naluto na nga pawikan.
Human sa maong operasyon ang NBI nagtinguha nga ma-clear ang F. Rallos St. niining maong mga ilegal nga kan-anan.
Ang pangulo sa Prevention, Restoration, Order, Beautification and Enhancement (PROBE) Team nga kuyog sa maong operasyon miingon nga ilang ipaabot ang hangyo sa NBI ngadto kang Mayor Tomas Osmeña.
“So i-recommend nako of course mangayo ko og approval sa policy direction sa Mayor recommend nako nga kuhaon nato, i-clear nato ang karsada F. Rallos, i-clear gyud nako from any kind of obstruction,” asoy ni Arce.
Gipasabot ni Arce nakita sab nila nga ang maong dapit daghang istraktura nga nagbabag sa dalan nga nakalapas na sa ordinansa sa siyudad.
Nagtuo si Arce nga kun mahawan na ang kilid sa dalan sa F. Rallos maglisod na kining ilegal nga pagpamaligya og putahe nga pawikan sa maong dapit. (/IBM)(BANAT NEWS)
- Latest
