CEBU, Philippines — Niining nagkaduol na ang Pasko, nagpasiugda og nagkalainlaing kalihukan ang pipila ka mga lokal nga kagamhanan alang niadtong mga tawo nga nanginahanglan og espesyal nga pagtagad.
Ang kagamhanan sa Dakbayan sa Mandaue mihimo og mga kalingawan diin sa labing unang higayon alang sa mga batang libud-suroy.
Uban sa maong mga batang libud-suroy ang ilang pamilya nga gikan sa 27 ka barangay sa siyudad. Sagad kanila nagpangidaron og 8-anyos ngadto sa 14- anyos.
Sila plastada nga nakatan-aw ug nakapaminaw sa gihimong konsiyerto nga gihimo sa plaza atubangan sa Mandaue City Hall.
Samtang ang kagamhanan sa Dakbayan sa Lapu-Lapu, mipahigayon og christmas party sa kapin kwatro mil ka Persons with Disablities nga gipangulohan ni Mayor Paz Radaza.
Gawas sa makalingaw nga programa, makapabusdik nga mga pagkaon, aduna say gihimong raffles diin ang tanan nga mitambong adunay bitbit pag-uli sa ilang tagsa-tagsa ka mga panimalay. (/DILT)(BANATNEWS)