CEBU, Philippines — Pangitaon sa kagamhanan sa Siyudad sa Talisay ang taho nga adunay ilegal nga ihawan sa dakbayan nga padayong nagtumod og karne sa merkado sa Brgy. Tabunok.
Nahimo kining maong pamahayag ni Konsehal Richard Francis “Choy” Aznar, kinsa maoy tsirman sa komitiba sa panglawas human siya makadawat og taho bahin sa maong isyu.
Giingong lima ka ilegal nga ihawan sa Talisay ang nadawat nga taho gikan sa National Meat Inspection Section (NMIS) nga padayong nag-operate ug naghatud og karne sa kamerkaduhan.
Gihimug-atan ni Aznar nga sa ihawan gyud sa Talisay ipa-ihaw ang mga hayopan aron masiguro nga ang karne nga ibaligya sigurado kini nga limpyo ug layo sa kagaw nga posibleng magbutang sa peligro sa panglawas sa mga konsumidor.
Nabalaka ang konsehal sa maong taho ilabi na karon nga nagsingabot ang Adlaw sa Pasko diin daghan ang mamalit og karne.
Asoy niini nga siya morekomendar sa paghingusog sa pagsusi sa merkado kon ang mga gipamaligya nga karne luwas ba sa mga konsumidor.
Naglaum usab si Aznar nga mohimo og lakang kabahin sa maong taho ang mga buhatan sa City Veterinarian ug City Health uban sa iyang buhatan. (/DILT)(BANATNEWS)