Senior Citizens ug PWDs nakadawat og pinaskohan
CEBU, Philippines — Subay sa nagsingabot nga Adlaw sa Pasko, dili lang ang mga kawani sa kagamhanan sa Dakbayan sa Lapu-Lapu ang makadawat og kwarta nga gasa kay lakip na niini ang dul-an sa 25 mil ka senior citizens ug singko mil ka persons with disabilities (PWDs) ang nakadawat og hinabang pinansiyal kagahapon..
Dungan nga gipangapud-apud sa Lapu-Lapu City government ang tag kwatro mil pesos ngadto sa mga katigulangan samtang tag P3,500 mil ang nadawat sa mga PWDs gikan sa 30 ka barangay nga naglangkub sa mga Isla sa Olango, Caubian, Caohagan ug Pangan-an.
Gihimo ang maong kalihukan sa Hoopsdome diin personal nga mitunol sa maong hinabang si Mayor Paz Radaza kinsa nabatasan na sa pagpanghatag sa maong grasya kon magsingabot ang Adlaw sa Pasko.
“Gisayo na nato (og hatag) para mahan-ay nila ang pagpamalit,” matud pa ni Radaza.
Kadtong mga senior citizens nga wala makakuha sa ilang gasa, ang mga taga City Treasurer’s Office na maoy mohatud niini.
Susamang kalihokan usab ang gikatakdang pagahimoon sa Dakbayan sa Mandaue karong adlawa nga pangulohan ni Mayor Luigi Quisimbing.
Makadawat og tag dos mil pesos ang mga senior citizens sa Mandaue karong semanaha. Ang maong kantidad maoy katapusan nga madawat sa mga senior citizen karong tuiga nunot sa pagbahig sa tulo ka hugna nga panghatag sa kinatibuk-ang kantidad nga mokabat sa sais mil pesos matag tuig.
Ang buhatan sa Mandaue City Social Welfare and Services (CSWS) adunay lista nga 18,482 ka senior citizens ug ang Office of the Senior Citizens (OSCA) sa dakbayan adunay tinuig nga gahin gikan sa kagamhanan nga mokabat sa P110 milyones. (Romeo T. Limpangog/DILT)(BANATNEWS)
- Latest