CEBU, Philippines — Mga opisyal sa Barangay Quisol, Dakbayan sa Danao nisurender og mga armas ug mga kahimanan sa pagbuhat og armas diha sa kapolisan sa siyudad niadtong Lunes sa hapon.
Si Police Superintendent Jaime Quiocho, hepe sa Danao City Police Station nibutyag nga boluntaryo nga gisurender diha kanila sa mga opisyal sa nahisgutang barangay ang mga armas ug kahimanan sa paghimo og armas.
Matud ni Quiocho nga resulta kini sa ilang pakighinabi sa mga kapitan ug opisyal sa kabarangayan sa siyudad.
Ang maong mga opisyal sa barangay nianha sa buhatan sa kapolisan ug nitugyan kini sa mga armas nga naglangkub sa kalibre .22 nga revolver nga kompleto sa parti, usa ka kalibre .38 nga revolver nga walay cylinder, kagamitan sa paghimo og armas ug lakip usab ang tulo ka magazine sa kalibre .45 nga pistol.
Gihangop ni Quiocho ang maong lakang sa nahisgutang mga opisyal sa barangay ug malaumon siya nga daghan pa nga mga opisyal sa kabarangayan sa siyudad nga mosuporta sa ilang kampaniya. -/BDB (BANATNEWS)