CEBU, Philippines — Gironda sa hiniusang pwersa sa Bureau of Internal Revenue-Region 8, National Bureau of Investigation-8 ang gibanabanang P60 Milyones nga mga sigarilyong adunay mga pekeng BIR stamps sa Ormoc City niadtong Miyerkules. Ang mga otoridad mihimo sa operasyon human nga mikatap sa siyudad ang mga pekeng mga sigarilyo hangtud nga natultolan sa BIR ug NBI ang apartment nga tinubdan niini diha sa Ormoc City.
Wa pa hinuon matino kon imported ba o locally-made lang ang maong mga sigarilyo apan si NBI special investigator Jess Gadaingan sa pakighinabi kaniya sa The Freeman (igsuong pamantalaan sa Banat News), ang maong mga sigarilyo diha gikan sa BOS Marketing sa maong siyudad.
Ang maong establisamento adunay duha ka mga bodega sa Barangay Cogon ug District 4 sa Ormoc City ug didto nakuha sa mga operatiba ang 2,026 master cases (boxes) nga may sud nga 20,260,000 sticks nga sigarilyo.
Ang matag master case adunay sud nga 500 paketeng sigarilyo. Ang matag pakete magbayad unta og P35 excise tax matag usa o P17,500 per master case. Apan tungod niini naalkanse ang gobiyerno og P35.5 milyones nga excise taxes gikan sa maong 2,026 ka mga kaha.
Matud pa ang maong operasyon sumpay sa unang operasyon nga ilang gihimo niadtong Oktubre 4 sa Tacloban City diin 1,215 master cases nga ilegal nga mga sigarilyo ang ilang nasakmit.
Gibanabana kadto nga mokantidad og P47 milyones nga diin makakolekta unta ang gobiyerno og excise tax nga P17.5 milyones.
Si BIR-8 assistant regional director Edgar Quejada mibutyag sa maong report nga moabot na og P107 milyones nga kantidad sa ilegal nga mga sigarilyo ang ilang nasakmit sud sa duha ka buwang operasyon.
Kon namayad pa kini og buhis moabot og P53 milyones na unta ang nakolekta sa gobiyerno. (/IBM)(BANATNEWS)