Testigos kinahanglang mokooperar sa inquiry

CEBU, Philippines — Gikinahanglan gyud nga mokooperar ang mga testigo, kabanay o ba kaha survivors sa mga insidente sa mga pagpatay dinhi sa Sugbo kon himuon na ang inquiry didto sa Senado.

Sila si Senador Grace Poe ug Riza Hontiveros kinsa naduaw sa Sugbo miawhag sa Senate Committee on Public Order and Dangerous Drugs ug Public Information and Mass Media nga mohimo na og imbestigasyon.

Si Hontiveros miingon nga ilang trabaho ang pagpanalipod sa tawhanong katungod ug kaluwasan sa publiko.

Sayo ning bulana, ang minority bloc nanawagan og imbestigasyon sa makaalarmang sunod-sunod nga pagpatay dinhi sa Sugbo. Sa Senate Resolution 915, senate minority floor leader Francis “Kiko” Pangilinan, Paolo Benigno Aquino IV, Antonio Trillanes IV ug Leila de Lima sila miingon nga makaalarma na kining mga pagpatay atol sa all-out war on drugs sa administrasyon.

Sigon ni Hontiveros susama ra kining inquiry sa inquiry sa extra-judicial killings didto sa National Capital Region nga ilang gihimo. Nalipay hinuon si Hontiveros nga andam ang kapolisan sa Sugbo moatubang kon ipatawag sila sa Senado.

Pipila sa mga nahitabong pagpatay dinhi sa Sugbo gidudahang mga polis ang naghimo sa krimen.

Samtang sa resolusyon nga giduso ni Poe, buot niyang tan-awon ang paningkamot sa kapolisan batok sa mga krimen nga gikalambigitan sa ilegal nga drugas dinhi sa Sugbo.

Susihon kon may kinahanglang usbon sa kasamtangang balaod aron mapakgang kining mga pagpatay ug masiguro ang kaluwasan ug seguridad sa publiko.

Base sa resolusyon ni Poe, gikan bulan sa Pebrero ngadto sa bulan sa Hulyo ning tuiga miabot na og 112 ang nakalas sa pagpamusil dinhi sa lalawigan sa Sugbo ug ang 92 niini biktima sa riding in tandem.

Ang mga biktima, mga opisyal sa barangay, konsehal, kapitan, abogado, bise mayor , mayor ug ahente sa Philippine Drug Enforcement Agency (PDEA).

“Such state of lawless violence and impunity has to stop in the name of the laws of men and of God,” tipik sa resolution ni Poe. (Le Phyllis F. Antojado/IBM)(BANATNEWS)