CEBU, Philippines — Gihulagway ni Senior Supt. Manuel Javier Abrugena, direktor sa Cebu Provincial Police Office, nga harassment sa kapolisan ang pasangil nga mistaken identity ang nahitabong operasyon sa Poblacion, Carmen niadtong Hulyo 18.
Nakalas sa maong operasyon si Reymark Taoy Quingco ug si Joseph Taoy, usa ka notadong durugista.
Matud ni Abrugena nga nagpahigayon sila og internal investigation kabahin sa maong taho.
“I believed that the operation is legitimate and within the bounds of law. We consider this as harassment charges,” si Abrugena niingon sa Banat News.
Padayag sa maong direktor nga modapig gihapon sila sa kapolisan sa Lungsod sa Carmen nunot sa resulta sa ilang kaugalingong imbestigasyon.
Apan wala na siya niasoy kabahin kung giunsa sa kapolisan sa pag-justify nga ang notadong pusher nga si Taoy mao ang napatay nga giila sa pamilya nga si Quingco.
Andam sila moatubang sa korte kabahin sa maong kaso.
Nirekomendar ang National Bureau of Investigation ngadto sa Department of Justice nga pasakaan og kriminal nga kaso ang upat ka polis lakip na ang hepe ug usa ka sibilyan human nasuta sa ilang imbestigasyon nga mistaken identity ug walay buy-bust nga nahitabo kang Quingco.
Nidangop ang pamilya sa NBI-7 sanglit masaligon sila nga dili durugista ang nakalas. (BANAT NEWS)