CEBU, Philippines — Nagtinguha karon ang lokal nga kagamhanan sa Lungsod sa Oslob nga ma-reclassify gikan sa rural area ngadto sa urban area ang Barangay Tanawan.
Si Oslob Mayor Jose "Jun" Tumulak nagkanayon nga ang Sangguniang Bayan sa lungsod nipalabang na kini og resolusyon kalabot sa maong tinguha ug isumitir kini ngadto sa provincial board aron usab maaprobahan.
Tumong sa LGU sa maong tinguha aron dili maguba ang 40 ka mga establisemento sa Barangay Tanawan nga anaa sa 30 meter easement gikan sa baybayon base sa assessment sa Department of Environment and Natural Resources (DENR).
Matud ni Tumulak nga human sa gihimong "marking" sa DENR sa niaging bulan nasuta ang mga establisemento ang anaa sulod 30 meter easement zone.
Si Tumulak nipatawag dayon og tigom tali sa mga resort owner ug tag-iya og ubang establisamento nga apektado.
Gibutyag ni Tumulak nga ang maong mga nakapatukod og estraktura diha sa lugar nipadayag kini sa ilang kabalaka nga maguba kini.
Samtang si Tourism Secretary Berna Romulo-Puyat nagkanayon nga human sa nahitabo sa Boracay nipadala sila og "love letters" sa lima ka "major tourist destination" sa Pilipinas diin nalakip niini ang Oslob.
Ang maong sulat nagpahimangno sa mga LGU ug business establishment nga mosubay sa environmental laws aron dili masusama sa nahitabo sa Boracay nga gipasirad-an ug pipila ka bulan aron ipaubos sa rehabilitation tungod sa kahugaw.
Si Tumulak nagkanayon nga wala pa siya makadawat sa formal letter gikan sa Department of Tourism (DOT) apan aduna nay nagpahibalo sa iyang buhatan kalabot niini. (/BDB)(BANATNEWS)