Duha gipamusil patay

CEBU, Philippines – Patay ang usa ka security guard sa Pasil Fish Port human gipusil alas 6:20 kagahapon sa buntag samtang sakay kini sa iyang motor kay mohatod sa iyang anak sa tulonghaan, diha sa may Sitio Huyong-Huyong Alaska, Barangay Mambaling, ning Dakbayan sa Sugbo.

Ang biktima naila nga si Jonard Sarbido, 53, residente sa Sitio Puntod Alaska sa maong barangay.

Matud pa ni Police Officer 1 Fred Carba, Desk Officer sa Mambaling Police Station giatangan sa duha ka wala mailhing mamumuno ang biktima ug gipusil kini sa makadaghan higayon sa nagkadaiyang parte sa kalawasan niini.

Sumala pa ni Carba ang anak sa biktima nga gipahibalo sa nahitabo daling miadto sa lugar ug midala sa amahan ngadto sa Cebu City Medical Center apan gideklarar sa  mga doktor nga patay na kini.

Sa laing bahin, 23 anyos nga lalaking giingong sakop sa usa ka gang ang gipusil patay sa miyembro usab sa ilang karibal nga gang diha sa Barangay Poblacion, Lungsod sa Cordova.

Si  Senior  Police  Officer  1  Alex  Noron sa  Cordova Police  Station miila sa biktima nga mao si Lyndon Bering, 23, taga Barangay Babag, sa  Dakbayan sa Lapu-Lapu  apan temporaryong nagpuyo sa Sitio Camolinas, Poblacion, Cordova.

Samtang ang mamumuno giila nga sila si Gil Jumao-as ug usa ka alyas Bulldog nga sakop sa karibal nga gang.

Nagbarog sa daplin sa karsada ang biktima sa dihang gihunongan kini sa mga suspetsado nga nagsakay og motorsiklo ug diretsong gipusil ang biktima.

Sayo pa nianang gabhiuna nakit-an ang mga suspek nagsige og balikbalik sa lugar. Giingong kaniadto pa may bikil ang duha ka grupo ug nagbinawsanay. (Romeo Limpangog/IBM)(BANAT NEWS)