Narco politicians mas tutokan sa kapolisan

CEBU, Philippines – Giingong modaghan ang ilegal nga drugas karong panahon sa eleksiyon human makadawat og impormasyon ang kadagkuan sa kapolisan nga gamiton kini sa mga kandidato pagpalit og boto.

Gihulagway hinoon sa Police Regional Office-7 nga malinawon ra ang tibuok rehiyon siete sa tibuok semana nga filing sa Certificate of Candidacy alang sa piniliay karong umaabot Mayo 18, 2019 kini sumala pa ni regional director PCSupt. Debold Sinas.

Nagsugod ang filing niadtong Oktubre 7 hangtod kagahapong adlawa.

Matod ni Sinas nga naghuwat na lang sila sa listahan sa tanang kandidato gikan sa Commission on Elections aron makatumbok na sila og mga lugar nga ideklarar nga election hotspots.

Sama sa mga nakalabayng piniliay, basehan sa mga awtoridad kon adunay mga krimen nga may labot eleksiyon ug adunay Intense Political Rivalry (IPR) ang usa ka lugar.

Giklaro ni Sinas nga dili nila i-profile ang mga kandidato apan i-kolekta lang nila ang maong listahan.

“We will just get the list sa ilaha, siguro kon naa silay gi-submit nga biodata mao lang to and then we will check with the data we have here,” si Sinas miklaro.

Nasayran nga ang DILG adunay planong mosumiter og listahan sa narco politicians ngadto sa COMELEC aron nga ma-disqualify sila sa midterm elections.

Giingong mangayo ra ang PRO-7 sa maong listahan aron itandi sa ilang gihuptang listahan.

Dugang ni Sinas mga hayan aduna pay mapuno sa maong listahan kon manawat ang maong mga kandidato og pundo gikan sa mga drug personality.

Si Cebu City Police Office director PSSupt. Royina Garma miingon nga personal siyang nakadawat og impormasyon nga gigamit sa pipila ka mga politiko ang ilegal nga drugas sa pagpalit og boto niadtong nakalabayng eleksyon.

“Kung tatanungin nyo kung tataas ba ang drugs? Possible talaga kung mauulit yung last elections,” butyag ni Garma.

Samtang misaad usab si Sinas nga mosunod sa pronouncement ni PNP Chief Oscar Albayalde nga dili mosuporta og politiko ilabi na karong piniliay.

“… kami kasi when we were assigned here, wala mi girecommend ni bisan kinsa. Merits is more necessary and delegation to the service. So karon we are not held by anyone,” dugang ni Sinas. (/DILT)(BANAT NEWS)