CEBU, Philippines – Patay’ng lawas sa usa ka lalaki nga gidungog nga ‘antingan’ giputlan og ulo ug natusak sa bala napalgan sa Sitio Sangkil, Barangay Cabasiangan sa Lungsod sa Balamban niadtong Lunes sa buntag.
Napalgan na lang sa barangay kapitan sa maong lugar nga nagbuy-od sa daplin sa kalsada ug putol na ang ulo sa biktima nga si Jonito Bontilao Maglasang, residente sa Barangay Matun-og, sa maong lungsod.
Nakuha sa kapolisan ang 21 ka buok kabhang sa kalibre .9mm, ug 12 ka mga kabhang sa kalibre .45 sa lugar diin napalgan ang maong bikima.
Sumala pa sa hepe sa kapolisan sa Balamban nga si Police Senior Inspector Deni Mari Pedrozo nga wala mosalir ang mga habak ug mga anting-anting sa nga gisul-ob sa biktima batok sa gibana-bana nilang upat ngadto sa lima ka mga mamumuno nga nihimo sa maong krimen.
Matud ni Pedrozo sa Banat News base sa gidaghanon sa igo sa bala ug giputlan pa gyud og ulo ang biktima, dako gyud og kalagot ang mibuhat niini.
“Marami daw siya kaaway sa area na yun. Palahubog din daw. Before may nag-attempt na rin na patayin siya,”matud sa maong hepe.
Sumala pa ni Pedrozo giingong nalambigit sab sa pagpangawat ang biktima didto sa usa ka tindahan sa Barangay Lusaran, Dakbayan sa Sugbo, silingang barangay sa Cabasiangan apan wala kini criminal record sa Balamban Police Station.
Sa laing pagpamusil niadtong Lunes sa gabii patay si Emilito Rubias, 41, human gipusil sa riding in tandem diha sa may Ward 2 sa Lungsod sa Minglanilla.
Padung na pauli sa Dakbayan sa Naga si Rubias luwan sa iyang motor sa dihang kini gipusil sa luyong bahin sa ulo sa mga lalaking nagmotor nga nagsunod kaniya. Patay na pagabot sa tambalanan ang biktima samtang wa pa matino kon unsay motibo sa krimen.
Patay usab ang usa ka drug surrenderee nga si Wendel Tampos, 38, taga Vamo, Barangay Paknaan, sa Dakbayan sa Mandaue nga gipusil sa riding in tandem diha sa Barangay Guizo.
Sumala pa sa kapolisan, nagbarog lang ang biktima sa lugar sa dihang gihunongan sa mga mamumuno ug gipaulanan og bala nga niresulta sa iyang kamatayon.
Nasayran nga napriso na kaniadto sa kaso sa ilegal nga drugas ang biktima. (Romeo T. Limpangog ug Rowena Capistrano/IBM)(BANAT NEWS)