CEBU, Philippines — Patay ang usa ka lalaki human giluba sa iyang kapuyong babaye niadtong miaging adlaw sa Sitio Banghiig, Barangay Calumbayong, Lungsod sa Sogod. Si Police Inspector Harley Apostol Silay nga maoy hepe sa Sogod Police Station miila sa biktima nga mao si Roy Garbo Agosto, 42, samtang ang suspetsado mao si Tita Genon Tapang, alyas Liezel, 49.
Matud pa ni Silay nga parehong nakainom ang duha apan pag-abot sa balay nagmaoy ang babaye ug gidunggab ang biktima gamit ang 38 pulgadang gitas-on nga kutsilyo diha sa liog, hawak ug bukobuko nga nakaingon sa kamatayon sa lalaki.
Ang suspek daling gisikop sa mirespondeng mga polis. Si PO2 Raffy Tapales sa Sogod Police Station miingon nga base sa ilang imbestigasyon pirmeng magmaoy ang babaye kon mahubog.
Sumala pa ni Tapales ang igsoon ug inahan sa namatay nitug-an nga nalandig na kaniadto sa tambalanan ang biktima kay gidunggab sa dihang nagmaoy ang suspek. (BANAT NEWS)