CEBU, Philippines – Bisan og gitugotan ni Gobernador Hilario Davide, III apan wala modayon og biyahe paingon ngadto sa Amerika ang mayor sa Daanbantayan nga si Vicente Loot matud sa iyang asawa nga si Malou Loot.
Niadtong Hulyo 17, 2018 si Loot nipadala og suwat kang Davide diin nananghid kining mobiyahe paingon sa Amerika sa Agosto 28, 2018 ngadto sa Septiyembre 10, 2018 alang sa personal nga katuyoan.
Apan si Malou nitataw nga wala modayon og biyahe ang mayor paingon sa laing nasud ug padayon kini sa iyang trabaho sa paghatag og serbisyo sa katawhan sa ilang lungsod. Niadtong buwan sa Agosto niining tuiga si Loot nabantayan nga wala na kini makita diha sa iyang buhatan sa munisipyo.
Apan giklaro sa iyang pamilya nga padayon gihapon sa pagtrabaho ang mayor bisan og wala kini makita diha sa munisipyo. Ang pamilyang Loot wala na usab motug-an sa nahimutangan sa mayor alang sa siguridad niini.
Sayo pa, subling gibutyag ni Presidente Rodrigo Duterte nga si Loot lakip sa listahan sa mga opisyal nga nalambigit sa ginadiling drugas.
Dugang niini, niadtong buwan sa Mayo niining tuiga si Loot uban sa iyang pamilya ang gibanhigan. (/BDB)(BANAT NEWS)