Satellite police station suportado sa PAC

CEBU, Philippines – Suportado ni Konsehal Joel Garganera, chairperson sa Police Advisory Council sa Dakbayan sa Sugbo, ang pagpatukod sa Pardo Police Station Satellite Office sa Inayawan.

Nakita ni Garganera nga gikinahanglan ang satellite office aron pagpalambo sa ilang buhatan ug walay balidong rason nga ihunong kini.

Wala kauyon ang konsehal sa pamahayag ni Inayawan Barangay Kapitan Kirk Bryan Repollo nga walay resolusyon sa konseho sa barangay nga nagtugot kaniya nga mopirma sa deed of donation.

Ang barangay resolution nga dunay petsa nga Pebrero 6, 2017 nagtugot sa barangay kapitan nga mopirma sa deed of donation ngadto sa Philippine National Police.

“Ang ako lang iklaro sa kapitan kung unsa man gyud tumong niya nga iyang kuwaon ang maong luna kay maka-traffic pero in the previous statement niya nga akong nabasahan nga himoon to siyang parking space para sa iyahang mga equipment, which is which?” matud ni Garganera.

Si Konsehal Raymond Alvin Garcia nagtuo nga ang kapitan nituman lang sa mando ni Mayor Tomas Osmeña.

“We should not blame barangay kapitan and barangay councilors, they are really just acting the orders of the mayor, very clear, kahibawo bitaw unsay nahitabo, unsay relasyon karon sa mayor ug kapolisan,” matud ni Garcia. (Decemay P. Padilla/GMR)

Tomas gisumbong ngadto kang Digong

Gisumbong ni Konsehal Raymond Alvin Garcia sa Barug Team Rama PDP-Laban sa Office of the President ang bangi nilang Cebu City Mayor Tomas Osmeña tali sa kapolisan ug sa Land Transportation Office-7.

Si Garcia nibutyag nga gipadala niya ang report niadtong Miyerkules kang Presidente Rodrigo Duterte pinaagi kang Executive Secretary Salvador Medialdea.

“Recent developments constrain me to inform you that, once again, our Mayor has deemed it fit to hamper the functions of the National Government-this time threatening to evict the Land Transportation Office (LTO)-7 from the city-owned lot it has been using for its office, and actually ordering the demolition of a Police Station, the construction of which is well underway, in Barangay Inayawan of our City,” tipik sa suwat ni Garcia.

Sigun ni Garcia nga gusto niini nga mahibawo ang presidente sa sitwasyon sa siyudad ubos sa pamunoan ni Osmeña. “As a Sangguniang Panlungsod member, it pains me to see the City of Cebu pitted against the National Government, and having our constituents suffer for it. While my colleagues and I continue the fight in the city council, there is only so much the minority bloc can accomplish,” dugang sa konsehal.

Ang konsehal niasoy nga panahon na aron masayud si Duterte sa lihok sa mayor batok sa kapolisan ug LTO-7.

Nagsugod ang dili maayong relasyon sa mayor ug Cebu City Police Office human sa suway nga pagbanhig kang Tejero Barangay Konsehal Jessielou Cadungog ug ang mayor nibahad nga bawion sa siyudad ang luna nga giokupar sa LTO-7. Una na nga nibahad si Duterte nga tamparoson niya si Osmeña. Masaligon si Garcia nga nakaabot na sa dunggan sa presidente ang report nga iyang gipadala. (/GMR)(BANAT NEWS)