CEBU, Philippines – Dugay ra nga nakapatukod ang kagamhanan sa Lungsod sa Tuburan og 24 ka evacuation centers sa wala pa nimando si Presidente Rodrigo Duterte.
Sa pagpangandam sa bagyong Ompong, si Duterte nimando sa National Disaster Risk Reduction and Management Council sa pagtukod og daghang evacuation centers. Kini aron dili mabalda ang pagtungha sa mga tinun-an sa mga tunghaan nga sagad himoong evacuation centers kung dunay katalagman.
Apan matud ni Tuburan Mayor Democrito Diamante nga sa hinapos nga bahin sa una niyang termino gisugdan na niya ang pagtukod sa mga evacuation centers.
Kini hinimo sa puthaw ug may atop nga sin nga tag P2.6 milyones ang matag usa.
Matud ni Diamante nga ang pundo lang sa 20 percent development fund ang ilang gisaligan sa paggasto.
Aduna pay laing tulo nga gikatakda nga mahuman karong tuiga.
Tuyo ni Diamante nga mabutangan og tagsatagsa ka evacuation center ang tanang 54 ka barangay sa lungsod. (/GMR)(BANAT NEWS)