CEBU, Philippines – Giawhag ni kanhi Dumanjug mayor Nelson Gamaliel Garcia ang Department of Interior and Local Government sa pag-aksyon sa kahiwian karon sa pagpadagan sa mga opisyal sa lungsod.
Sa iyang suwat ngadto kang DILG-7 Director Leocadio Trovela, iyang gibutyag nga nilingkod sa pwesto ang gitangtang nga si Mayor Efren Guntrano Gica niadtong Agosto 1, 2018 bisan wala pay finality ang desisyon sa Court of Appeals.
Sa pikas bahin si Bise Mayor Rene Asentista nga nilingkod isip mayor ang nibiya sab sa pwesto.
Dihang gipatuman ang kamanduan sa Ombudsman sa pagtangtang kang Gica, ang DILG nimando kang Asentista sa paglingkod isip mayor samtang si Konsehal Cesar Baricuatro isip bise mayor niadtong Enero 4, 2018.
Si Gica nakit-ang sad-an sa paghimo-himo sa liquidation report apan ang CA nibali sa desisyon sa Ombudsman.
Si Garcia nga maoy nisang-at sa kaso niduso sab og motion for reconsideration.
Matud ni Garcia nga dili pa final ang desisyon sa CA maong dili pa angayang molingkod si Gica.
Gisanglitanan ni Garcia ang sitwasyon sa Dakbayan sa Toledo diin gisuspenso si Mayor John Henry Osmeña sa Ombudsman og usa ka tuig apan ang CA nibali sab sa desisyon human sa walo ka buwan nga pagkasuspenso.
Apan ang DILG nimando nga kinahanglang tiwason ni Osmeña ang nahabiling upat ka buwan sa iyang suspensiyon. (BANAT NEWS)