CEBU, Philippines – Mokabat sa P1.3 milyones ang balor sa shabu nga nasakmit sa buy-bust operation niadtong Lunes sa gabii sa Cogon, Tagbilaran City, Bohol.
Ang dinakpan giila nga si Geoffrey Silao, 33, residente sa maong dapit ug lumad nga taga Dakbayan sa Talisay, Cebu.
Nakuha gikan kang Silao ang usa ka extra large, lima ka large, ug duha ka medium nga pakete sa shabu ug kwarta nga P1,000.
Sumala pa sa hepe sa Provincial Intelligence Branch sa Bohol Provincial Police Office, Supt. Christopher Navida, nga gi-monitor nila sulod sa tulo ka semana ang suspek kinsa giingong tinubdan sa mga pusher nga nadakpan sa polis sa Bohol.
Gibana-bana nga makabaligya og 50 ngadto sa 70 ka gramo nga shabu matag semana ang dinakpan.
“Siya ang source sa Tagbilaran City and umaabot din siya sa other municipalities,” si Navida nagkanayon.
Dugang sa hepe nga ilang gisubay kun kinsa ang tinubdan niini ug nakig-alayon na sab sila sa kapolisan sa Dakbayan sa Talisay alang sa mga posibleng koneksyon niini sa dakbayan.
Samtang gibalhug sa detention cell sa kapolisan sa Lungsod sa Tabogon ang giilang bag-ong pusher og shabu nga nadakpan sa buy-bust operation alas 7 pasado sa niaging gabii sa Barangay Daantabogon.
Si Senior Police Officer 2 Alman Acabal sa Tabogon Police Station maoy nangulo sa buy-bust operation diin nasikop si Jhonman Colegado, 20, kinsa nakuhaan og usa ka gamay nga pakete sa shabu ug P200 nga marked money. (Romeo T. Limpangog/GMR)(BANAT NEWS)