Dugang reklamo batok Tomas

CEBU, Philippines — Misumiter na og pormal nga reklamo ang Police Regional Office-7 ngadto sa Department of Interior and Local Government (DILG) batok kang Cebu City Mayor Tomas Osmeña subay sa gihimo niining pagpagawas sa tulo ka mga dinakpan sa Parian Police Station.

Gibutyag sa direktor sa PRO-7 nga si Police Chief Supt. Debold Sinas nga igo ra nilang gisumiter ang kopya sa reklamong gipasaka sa Parian Police Station ngadto sa Ombudsman batok sa mayor.

“Di nako pangunahan ang DILG. That’s their job,” tubag ni Sinas dihang gipangutana siya kun ang maong kaso makapalangkat ba sa police powers ni Osmeña.

Gihatagan usab nila og kopya sa reklamo si PNP Chief Oscar Albayalde.

Taliwa sa gihimong legal nga lakang, gitin-aw sa heneral nga nagpabilin gihapon ang maayong relasyon nila sa mayor.

Gani, matud pa nga ang hepe sa Cebu City Police Office nga si Police Senior Supt. Royina Garma magsige gihapon og tambong sa meeting sa Cebu City Hall.

“I always tell my people sa ubos kung pwede ayaw mo paapekto sa mga political statements. Trabaho lang,” sigon pa ni Sinas.

Kahinumduman nga niadtong Agosto 24, base sa report sa Parian Police Station nga miadto si Osmeña sa ilang buhatan ug mimando sa pagpagawas sa mga dinakpan nga sila si Ramir Amaca, Romeo Appareca ug Romeo Cuevas. Sila nasakpang namaligya og ilegal nga refilled butane canister sa T. Padilla Public Market.

Sumala pa ni Garma nga gi-harass sa mayor ang mga polis nga nabilin sa estasyonan ug wala nay nahimo hinungdan nga gituman ang mando sa mayor.

Apan nanalipod si Osmeña nga iya lang gikustodiya ang maong mga dinakpan human siya maluoy kanila kay igo ra kining nanginabuhi.

Hinungdan nga nasuko si Garma kay matud pa nga walay bisan usa ka balaod nga nagtugot sa mayor nga magpagawas og dinakpan gikan sa bilanggoan aron personal nga ikustodiya. (BANAT NEWS)