Konsehal wa pa tubaga sa DOE
CEBU, Philippines – Sukad 2014, wala pa kadawat og tubag sa Department of Energy si Konsehal Dave Tumulak, chairman sa committee on public order and safety sa konseho sa Dakbayan sa Sugbo labot sa iyang gihan-ay nga ordinansahon alang sa pagpamaligya og butane.
Ang ordinansahon ni Tumulak nagdili sa paghimo, pagbaligya ug pag-distribute og LPG-refilled butane canisters sa siyudad.
Matud pa nga gikinahanglan kini sanglit sagad sa mga tawo sa siyudad nigamit og butane canister.
Buot sa konsehal nga mohatag og komento ang DOE sa iyang gihan-ay nga ordinansahon ug kung unsay ilang mga sugyot apan hangtud karon wala pa kini nabalik.
Buot sutaon sa konsehal kung kinsay modeterminar sa sulod sa butane canister kun kini LPG ba o butane ug duna bay device nga maka-detect sa sulod sa canister.
Laing pangutana ni Tumulak mao ang specification sa canister aron dunay uniformity, unsang klase sa metal, aluminum ba o stainless ug uban pang mga pangutana.
Ang gusto mahitabo ni Tumulak nga ang DOE mo-certify kun ang sulod sa canister LPG ba o butane diin sigun niya pwede nga ang ahensiya makig-alayon sa tanang oil companies, makig-meeting ug mohimo og guidelines nga idili gyud ang backyard refilling stations. (/GMR)(BANAT NEWS)
- Latest