CEBU, Philippines — Kun mahatagan og higayon nga maestorya si Presidente Rodrigo Duterte karong adlawa, si Cebu City Mayor Tomas Osmeña niingon nga iya kining pahibaw-on labot sa sitwasyon sa Metro Cebu diin nagduda siya nga ang kapolisan dunay kalambigitan sa sunod-sunod nga patay nga nahitabo.
Nagkanayon ang mayor nga ang Presidente angayan masayud sa unsay nahitabo sa Sugbo. “Daghan unta, I really don’t like to just make singit and talk to him unless you ask me the question. He should know,” matud ni Osmeña.
Sayo niini si Osmeña niingon nga ang polis nalambigit sa mga nahitabong patay sa Sugbo nga nakapa-alarma kaniya isip chief executive sa Siyudad sa Sugbo.
Nagkanayon sab kini nga sukad nga nilingkod ang bag-ong director sa Cebu City Police Office, Senior Superintendent Royina Garma, ug Police Regional Office (PRO-7) director, Chief Superintendent Debold Sinas, nagsugod og saka ang kaso sa pagpatay.
Gani iyang gihulagway ang siyudad nga “criminal city” tungod sa kadaghan sa mga insidente sa patay dungan sa pagbutyag nga dili na luwas ang siyudad.
Giklaro hinoon ni Osmeña nga dili siya imbitado sa kalihukan ug kini nagtuo nga alang kini sa mga mayor sa kalungsuran.
Si Duterte moanhi sa Sugbo karong adlawa alang sa Visayas Island Cluster Conference sa League of the Municipalities in the Philippines nga tambungan sa dili mominus 300 ka mayor gikan sa Central, Eastern ug Western Visayas Regions.
Sa iyang bahin, si Bise Mayor Edgardo Labella kinsa maoy presidente sa Partido Demokratiko Pilipino-Lakas ng Bayan-Cebu City Chapter nipahibawo nga motambong siya sanglit imbitado man siya. Ang imbitasyon pinaagi sa Office of the Presidential Assistant for the Visayas.
Dili pa hinoon makompirmar ni Labella kun ang iyang mga kaalyado nga mga opisyal sa siyudad imbitado ba sab.
“Yes, I am invited. But for others, I have to check but I believed they received invitation, a dinner with Special Assistant to the President Christopher Lawrence “Bong” Go,” matud ni Labella. (BANAT NEWS)