CEBU, Philippines – Nabangalan sa mananagat ang patay nga lawas sa usa ka lalaki sa Barangay Japitan, Barili kagahapon sa buntag.
Walay nakaila sa maong lalaki sa lugar diin kini nadagsa ug gibanabana nga 5’2” ang gitas-on, kasarangan ang gidak-on sa panglawas, pution, adunay uwat sa dughan ug bungot nga color gray.
Nagpantalon kini og maong nga adunay bakus nga color brown ug sweat shirt nga itom ug adunay relo nga silver gold.
Matud ni Police Officer 3 Jeffrey Alpas, desk officer sa Barili Police Station, nga nakadawat sila og tawag gikan kang Barangay Kapitan Dario Montemayor sa Japitan nga nakabangal og patay nga lawas ang usa ka mananagat sa ilang lugar nga nagpautaw-utaw sa dagat alas 8 pasado sa buntag.
Dugang ni Alpas nga posibleng dagsa lang ang maong patay nga lawas sa lugar tungod kay walay nakaila sa mga residente.
Wala hinooy nakit-an nga samad pinusilan sa lawas apan ang ulo niini ang niaksyon na og kadugta. (/GMR)(BANAT NEWS)