Babaye gipusil sa riding-in-tandem
CEBU, Philippines – Usa ka 24 anyos nga babaye ang naangol human gipusil sa duha ka wa mailhing lalaking nagmotor diha sa Golden Ville, Banawa, Barangay Guadalupe ning Dakbayan sa Sugbo niadtong Huwebes sa gabii.
Ang biktima giila sa Guadalupe Police Station nga si Trizielle Villaroman Garcia, usa ka human resource staff sa usa ka kompanya.
Si Senior Inspector Eduard Sanchez, hepe sa Guadalupe Police Station miingon nga gikan sa trabahoan ang biktima ug sa dayon niining kanaog gipusil kini sa mga mamumuno.
Matud pa nagpaabot pa sa iyang sukli ang biktima dihang kini gipusil sa liog ug sa tuo nga ilokan.
Pagkadungog sa drayber sa buto sa armas dali kining nisutoy og padagan dala gihapon ang biktima.
Sa dagan sa imbestigasyon si Sanchez mitug-an sa Banat News nga away sa trabaho ang motibo sa maong krimen kay pipila ka semana sa wala pa mahitabo ang krimen daghang mga drayber ang gipanaktak ni Garcia.
Giingong ang lap top sa biktima gipahimungtan og duslak og screw driver ug ang gidudahan mao ang gipanaktak nga mga drayber. (Rowena Capistrano/IBM)(BANAT NEWS)
- Latest