CEBU, Philippines – Nitumaw ang huhungihong sa Dakbayan sa Talisay nga si Bise Mayor Alan Bucao magpapili sa pagkamayor sa sunod tuig nga piniliay.
Kini human adunay account sa Facebook nga nitumaw nga nagpangan og “Mayor Alan Bucao 2019.”
Apan si Bucao dali nga nakabaraw niini pinaagi sa pag-post sa iyang account nga scam kini nga account.
Ang legitimate nga account sa bise mayor mao ang “Vice Mayor Alan G. Bucao”.
“Warning!!! There is a recently created fake FB page named Mayor Alan Bucao 2019. A malicious and misleading page title obviously created to put a strife between Gullas and Bucao tandem. We encourage everyone to report it as scam at once. Thank you for your cooperation!” tipik sa post ni Bucao. Matud ni Bucao nga aduna siya’y gipangdudahan nga naghimo sa peke nga account apan dili lang una niya ibutyag.
Siya nagkanayon nga sugod na sab ang lihok sa politika apan iyang giseguro nga pabilin ang tandem nga Samsam-Bucao sa partidong Alayon sa sunod nga tuig nga piniliay.
Nasayran nga nagkasabot na sila nga si Kongresista Gerald Anthony “Samsam” Gullas ang mag-mayor samtang si Bucao magpabilin isip bise mayor sa siyudad.
Nadungog nga ang moatbang nila mao si kanhi mayor Johnny Delos Reyes apan wala pa kini kisaw karong panahona.
Dugang pa ni Bucao nga atimanon lang una niya ang iyang gimbuhaton kay layo pa ang eleksyon. (/GMR)(BANAT NEWS)