Drug test sa mga tour guides himoong regular
CEBU, Philippines – Kinahanglang ipaubos sa regular nga random drug test ang mga local tour guides sa Lalawigan sa Sugbo base sa giamendar nga Provincial Tourism Code.
Matud ni Bise Gobernador Agnes Magpale, chairman sa Provincial Tourism Commission, nga kini aron pagseguro nga walay nalambigit sa ilegal nga drugas sa mga tour guides nga maoy frontliner sa turismo sa Sugbo.
Niadtong Enero dili mominus 18 ka tour guides ang nagpositibo sa drug test sa Lungsod sa Badian.
Gawas sa screening sa mga tour guides, gilakip sa tourism code ang anti-sex tourism diin matud ni Magpale gidili ang pagkuha og hulagway sa mga bata kun kini nakasul-ob lang og pangkaligo, ilabi na og dili paryente ang nikuha sa hulagway.
Sa pagkakaron matud ni Magpale nga padayon ang ilang tinguha nga molambo pa ang turismo sa Sugbo taliwala kini sa sunod-sunod nga patay nga nahitabo sa probinsiya.
Nanghinaut si Magpale nga ang kriminalidad nga nahitabo karon dili makaapekto sa turismo ilabi na nga pipila sa mga magpapatigayon ang nipadayag na og kabalaka.
Hinoon matud sa bise gobernador nga wala pay report nga adunay investor nga niatras sa pamuhunan sa probinsiya tungod sa kriminalidad nga nahitabo. (/GMR)(BANAT NEWS)
- Latest
