Mga tanod gibansay pagmonitor sa trapiko
CEBU, Philippines — Gibansay og tulo ka adlaw sa mga sakop sa Traffic Enforcement Agency of Mandaue (TEAM) ang mga barangay tanod sa Dakbayan sa Mandaue aron sila na ang mo-monitor sa trapiko sa ilang tagsa-tagsa ka mga dapit. Ang chief of operations sa TEAM nga si Glenn Antigua nagkanayon nga ilang gipaubos og training ang mga tanod labot sa pagkontrol sa trapiko sa kadalanan ug pagpahibawo kanila mahitungod sa mga ordinansa sa siyudad kabahin sa trapiko.
"Human sa training, ato sila i-deputize. Nya pwede na sila maka-isyu og citation ticket. Maoy gusto ni Mayor (Gabriel Luis) Quisumbing nga ma-deputize sila then maka-isyu og citation ticket para maka-enforce sila sa traffic laws sa ilang mga barangay,” butyag ni Antigua.
Nanghinaut si Antigua nga sa hinay-hinay nilang pagbansay sa mga tanod, makatabang na unya sila sa TEAM sa pagpatuman sa balaud sa trapiko sa kadalanan sa ilang mga lugar samtang sila nagbantay sa mga dagkong dalan sa dakbayan.
Samtang karong semanaha, tag tulo ka radyo ang ihatag sa TEAM ngadto sa 27 ka barangay sa siyudad, wala pay labot niini alang sa Mandaue City Police ug Mandaue City Fire aron mas dali ang ilang komunikasyon nga nagkonektar sa ilang Command Center alang sa mas daling aksyon kon adunay motumaw nga emerhensiya. (BANAT NEWS)
- Latest